Homélie du jeudi saint:
Nyob zoo cov me nyuam, cov niam cov txiv, kwv tij neej tsa phooj ywg sawv daws,
Hnub no zoo hnub, peb tuaj sib fim ib pliag hauv lub Thaj Txi Ntuj hnub 5 Ntshiab no. Peb thov ua Txiv Tswv Qhia Alphonso tsaug, nrog cov Txiv Plig, cov Niam Nkauj Xwb thiab cov tub qa tub num sawv daws. Kuv yog nej ib tug phooj ywg, T.P Cwj Vuam Chiv, tshua txog ne sawv daws txhua leej txhua tus. Txawm tias kuv pliaj plhu thiab lub cev tuaj tsis txog nej, los kuv lub siab thiab ntsuj plig tuaj fim nej nrog nej txuas lus hauv lub suab ncauj suab lus no.
Hnub no yog hnub 5 Ntshiab, yog ib hnub tseem ceeb thiab loj kawg nkaus rau tas zeej tsoom neeg ntseeg thiab teev Yes Xus. Peb los ua neeg teev hawm Yes Xus, yog peb tsis pom hnub 5 Ntshiab no muaj qab hau los peb tsis paub hnub 5 Ntshiab no muaj nqes npaum li cas, ces peb sav ib qho koob hmoov loj txhawb peb txoj kev ua neeg ntseeg thiab teev hawm Huab Tais Tswv Ntuj. Thaum peb sav qhov koob hmoov loj txhawb peb, ces peb zoo li tsob qoob loo txawm rau hauv ib thaj av phem av tsuag tsis tawg paj txi txiv zoo, nyob ntxoov liaj ntxoov teb xwb. Txhais tias peb ua ib tug neeg ntseeg Tswv Ntuj tuag zawv, tsis muaj kev ntseeg tob ti txha, teev ntuj los twb nkees, luag txib yus los tsis tau hauj lwm, yus lam ua neeg ntseeg Tswv Ntuj xwb yus twb tsis paub xyov yuav ua dab tsi thiaj muaj txiaj ntsim. Txawm peb ib txhia twb los ua neeg ntseeg Tswv Ntuj ntev lawm, los peb nyuam qhuav los tshiab, los peb tseem tab tom los npaj siab txais lub Cim Ntxuav, los tej txhia tseem tsis tau txiav siab los. Txawm li cas, xav kom sawv daws qhib ntsej mloog thiab khaws hnub 5 Ntshiab no lub ntsiab lus los pab kom nyias pom kev, muaj zog, nyiam thiab nquag ua ib tug neeg teev hawm Tswv Ntuj kub siab lug, tau hauj lwm thiab zoo nyiam. Txhob ua ib tug neeg ntseeg ua zuav ua zi muag li ncuav. Yog li ntawd, vim li cas hnub 5 Ntshiab no muaj qab hau thiab muaj nqes ?
-Vim muaj hnub 5 Ntshiab, yog hnub Yes Xus tsim muaj Thaj Txi Ntuj, tsim lub Cim Yug. Yes Xus yog Tswv Ntuj Leej Tub, Yes Xus nqes saum ntuj los ciaj neeg kom cawm tau peb, hlub tau peb tib neeg. Peb kuj yug los ua neeg, muaj ib hnub, peb yuav ncaim lub ntiaj teb. Yes Xus paub tias txog nws lub caij nyoog ncaim ntiaj teb lawm. Hmo hnub 5 Ntshiab, Yes Xus nrog nws cov thwj tim noj pluas hmo kawg. Yes Xus ua ib lub cim cev nws txoj sia txi Leej Txiv Tswv Ntuj los cawm tag lub qab ntuj neeg.
-Vim hmo hnub 5 Ntshiab, Yes Xus muab mov thiab cawv los ua nws lub cev thiab roj ntsha: “
Nov yog kuv lub cev muab rau nej kom nej ua li ntawd nco kuv txiaj ntsim; 25 Lub ntim kuj tib yam, noj hmo tas, nws hais tias: lub ntim no yog lus cog tshiab hauv kuv ntshav, kom nej ua li ntawd thaum twg nej haus, nco kuv txiaj ntsim 1 KLN 11,24-25.” Vim Yes Xus kom peb ua Thaj Txi Ntuj nco txog Yes Xus kev txi Leej Txiv Tswv Ntuj hlub peb, tuag nthi rau peb, cawm peb. Niaj hnub peb ua Thaj Txi Ntuj, peb ntseeg tias cov mov thiab cov cawv peb muab los ua Thaj Txi Ntuj, tsis yog mov thiab cawv lawm, mov yog Yes Xus lub cev thiab cawv yog Yes Xus cov ntshav lawm.
-Thaj Txi Ntuj yog ib lub Cim loj thiab zoo tas nrho. Tus neeg ntseeg pom Yes Xus lub cev thiab cov ntshav yog ntawm lub Thaj Txi Ntuj. Vim li ntawd, peb tuaj txais Yes Xus lub cev thiab cov ntshav nrog Yes Xus ua tib tug, koom tib txoj sia, ua tib lub siab, hlub Tswv Ntuj thiab hlub tib neeg txi tau peb txoj sia rau Leej Txiv Tswv Ntuj thiab rau tib neeg ib yam li Yes Xus. Phim peb txhob ua txhaum, peb thiaj yuav tsum lees txhaum, phim peb yuav ntshiab huv thov Yes Xus zam peb tej txhaum.
-Peb los ua ib tug neeg ntseeg Tswv Ntuj teev Tswv Ntuj, peb yuav kub siab lug niaj hnub koom Yes Xus Thaj Txi Ntuj txhob sav li. Yes Xus tuaj ntsib peb, muab nws lub cev thiab cov ntshav ua txhiam xws yug peb. Phim peb yuav nquag plias, zoo siab muab tag nrho peb lub neej, tag peb lub siab cev nrog cov mov thiab cov cawv hauv Yes Xus Thaj Txi Ntuj txi rau Leej Txiv Tswv Ntuj. Vim li ntawd, Thaj Txi Ntuj mas muaj nqes thiab muaj txij ntsim kawg, kom peb nco ntsoov.
-Tsis tas li ntawd, hmo hnub 5 Ntshiab, Yes Xus tseem ua ntxiv lwm lub cim rau cov thwj tim pom. Yes Xus sawv mus ntxuav cov thwj tim ko taw. Peb twb los ntseeg Tswv Ntuj, peb paub ntsoov tias peb tsis txawj mloog Tswv Ntuj lus kom zoo, peb tsis muaj zog ua qhov zoo kom tau xis Tswv Ntuj siab. Peb yuav vam thiab siv zog thov Huab Tais Yes Xus pab peb ces peb thiaj txawj ua zoo zuj zus tuaj. Huab Tais Yes Xus yog peb tus piv txwv hlub neeg, tus piv txwv qhia peb sib zam, peb yuav siv zog niaj hnub yoog nws, taug nws tus roj tus hneev: “
13 Nej li, nej hu kuv ua Xib Hwb thiab Huab Tais, nej hais zoo kawg, kuv yog.14 Yog tias kuv, Huab Tais thiab Xib Hwb ntxuav nej ko taw, nej thiab, nej yuav tsum ntxuav ib leeg ko taw rau ib leeg 15 Kuv muab ib tug piv txwv rau nej, kom nej ua li ntawd, yam li kuv ua rau nej.” Txoj kev ua zoo, tsis yooj yim, peb ua tsis tag, ua tsis kawg li. Vim li ntawd, peb yuav kub siab lug rau txoj kev teev ntuj, thov Huab Tais Yes Xus pab peb, ces peb yuav tsis cia peb lub ncauj muaj taug li nab, cheem peb lo lus tuaj pos thiab chob neeg txhob hais, tso tej lus xaiv lus ncua pov tseg, tsis cem tsis dag luag tej. Ua cas Yes Xus kom peb sib ntxuav ko taw rau peb, koj ntxuav kuv taw, kuv ntxuav koj taw yog dab tsi ? Peb sib ntxuav taw yog yuav sib yoog, sib zam, sib hlub, sib pab, koj txhawb kuv, kuv txhawb koj hauv peb kev ua neej. Yes Xus ntxuav nws cov thwj tim ko taw, vim Yes Xus hlub nws cov thwj tim. Yes Xus zam Yus Das tus thwj tim lim hiam npaj muab Yes Xus rau cov txwj laus ntes tua dai saum ntoo cuam. Yes Xus paub Yus Das lub qe lim hiam, tiam sis Yes Xus hlub Yus Das ib yam lwm cov thwj tim. Peb kuj zoo li Yus Das, peb hlub Yes Xus tsis tag peb lub siab, tiam sis Yes Xus hlub peb tag siab nrho. Vim li ntawd, yog peb mloog Yes Xus lus, hlub Yes Xus tag siab nrho, peb thiaj yuav txawj sib hlub thiab sib zam tau rau peb.
Ib tsoom phooj ywg, thov kom hnub 5 Ntshiab no, ua peb lub siab thiab lub tswv yim to ntshua txog lub txiaj ntsim Yes Xus Thaj Txi Ntuj, tim Yes Xus hlub peb leej tib neeg, Yes Xus zoo siab hlo muab nws lub cev thiab roj ntsha cev txi rau Leej Txiv los cawm peb.
Montsinéry 05.04.2017 CVChiv
Homélie du vendredi saint: Cov niam cov txiv, kwv tij neej tsa sawv daws,
Hnub no yog hnub 6 Ntshiab, yog ib hnub peb muaj kev tu siab loj, vim tias tim peb ntiaj teb neeg lub txhoj lub txhaum (siab lim hiam, siab phem, siab dub, siab nkhaus, muab hlob, twm xeeb, khav theeb, cib nyeej, ntxub neeg, liam neeg, tub sa, tua neeg, hiam neeg, txhav khem, yees hlob, thab plaub, dag, ua plees ua yis…) ua Yes Xus tus ncaj ncees thiab dawb huv, tsis muaj ib qho txhaum hlo li poob tsim, raug liam, raug txim, raug tua tuag ua daj tes dai ncuv saum ntoo cuam li tus neeg tub sab, tua neeg. Peb tu siab rau peb cov txhaum ua Yes Xus tuag.
Hnub 6 Ntshiab no, yog hnub Yes Xus raug tsim txom siav tu nrho nrog cov tub sab, cov neeg phem koom ib nqag, tuag ua ib pawg. Vim li ntawd, peb yuav los piav txog txoj kev Yes Xus raug tsim txom tuag pab tau peb dab tsi, qhia thiab txhawb dab tsi rau peb txoj kev ntseeg thiab teev Yes Xus ? Peb kuj yuav los hais ob peb los txog hnub 6 Ntshiab no, peb cov neeg teev Yes Xus hauv peb lub Koom Txoos Niam Kas Tos Liv taug Ntoo Cuam kab ke thiab pe Ntoo Cuam. Tim li cas peb taug Ntoo Cuam kab ke thiab peb pe Ntoo Cuam ?
Feem ntau, peb twb tsis nco qab faj, tsis xav dab tsi txog Yes Xus kev raug tsim txom tuag li. Peb tuaj teev ntuj, peb mloog cov zaj nyeem tag los peb lub siab twb tsis ras, peb lub tswv yim twb tsis qhib los txais Tswv Ntuj lus. Xyov peb puas khaws tau Tswv Ntuj lus ib los ua tshuaj pab peb li. Txoj kev Yes Xus raug tsim txom tuag, tsis yog ib zag dab neeg peb muab los hais ib xyoos ib zaug rau sawv daws mloog. Yes Xus kev raug tsim txom tuag yog niaj hnub no peb tib neeg lub neej, yog tus tib neeg ncaj ncees lub neej raug luag ntxub, raug luag hiam tuag. Yes Xus kev raug tsim txom tuag yog nej ib tug txheeb ze lub neej, yog nej lub neej los yog nej tus me nyuam lub neej raug txom nyem raug hiam. Tos Yes Xus raug tsim txom tuag, tim peb tib neeg siab phem siab lim hiam. Yes Xus tsis tau ua tub qaug tsis tau ua siab leej twg, Yes Xus tsis tau hais ib los yuam kev tsim nyog nplua, tsis ua txhaum tib neeg twg ib qho dab tsi. Yog tim kev ntxub, tim kev liam, kev khib thawb Yes Xus mus raug ntsia tuag saum ntoo cuam. Yuav kom peb to taub Yes Xus kev raug tsim txom tuag, peb yuav tsum piv rau ib tug neeg ncaj neeg zoo raug luag tua tuag. Yam li ib tug me nyuam xeeb tau rau hauv leej niam plab, neb ob niam txiv pom zoo muab kaus pov tseg. Tsis yog neb xwb, muaj neeg nrog neb cuab neb taw. Tus kws tshuaj zoo siab pab neb tua tus me nyuam rho tawm hauv plab. Tsis yog neb thiab tus kws tshuaj xwb. Txoj cai qhib lug, tso lus dav fo leej twg xav rho me nyuam pov tseg ua tau. Peb pom tias tus me nyuam tsis tau ua tub qaug, tsis tau ua txhaum leej twg, sawv daws cia li txiav txim muab nws tua rho tawm hauv plab yam saib tsis taus nws tsis hwm nws li. Yes Xus tuag zoo li tus me nyuam mos. Tsis tas li ntawd xwb, Yes Xus tuag, vim Yes Xus zoo siab nrog tus me nyuam mos tuag kom cawm tau tus nyuam mos. Yes Xus zoo siab nrog peb tus neeg txheeb ze luag muab tua tuag kom hlub tau nws. Yes Xus zoo siab nrog cov tub sab tuag ua ib pawg kom zam tau lawv cov txhaum rau lawv. Tos Yes Xus tuag, vim Yes Xus kev hlub peb tib neeg loj dhau. Yes Xus hlub peb loj tshaj qhov phem thiab lim hiam peb ua rau tej tib neeg thiab ua rau Yes Xus. Lub tsiaj ntsim hnub 6 Ntshiab no, peb yuav thov Yes Xus pab peb kom peb dim txhua txoj kev phem, pab kom peb nrauj tau qhov phem paug tuaj rau peb thiab thov Yes Xus pab peb cog Tswv Ntuj kev hlub neeg kom ciaj kom hlob thiab muaj zog hauv peb ib yam li hauv Yes Xus.
Txog ntawm kev taug Ntoo Cuam kab ke thiab pe Ntoo Cuam muaj ib lub ntsiab tob thiab loj heev, peb lub tswv yim ntsuas tsis ti qab, peb lub siab pom tsis ti ntug thiab tsis nto ntsis. Ntoo Cuam yog ib tug quab yuam Yes Xus tuag. Ib tug quab, tsis yog ib yam twj zoo nkauj zoo saib. Ib tug quab yog ib yam twj rhiab siab, tsiv ntsia, ntsawv siab. Yes Xus tsis xaiv qhov zoo nkauj. Yes Xus ua siab txais txoj kev rhiab siab, ua siab txais txoj kev ntsawv siab. Yes Xus tsis xaiv txoj kev tau zoo tuag, tsis nrhiav ib lub ntees tuag zoo. Peb tej kev lim hiam, kev txhaum ua Yes Xus tuag txom nyem txaus, poob tsim loj, tsis muaj neeg tau luag pom, tau luag ntsia Yes Xus lub pliaj plhu. Qhov peb paub, Ntoo Cuam kab ke coj peb kev los nrog Yes Xus taug kev txom nyem. Peb hnov, Muaj ib tug neeg lub npe hu ua Xis Moos Kws Les Nais, nrog Yes Xus kwv tus ntoo cuam. Tiam sis, qhov tseeb Yes Xus tuaj hauv lub sim ceeb, nrog peb kwv peb tus ntoo cuam. Ntoo Cuam kab ke qhia peb tias, yug los ua leej tib neeg, peb nyias muaj nyias ib tug ntoo cuam, nyias muaj nyias ib tug quab ntawm nyias hauv ntej. Peb nyias yuav kwv nyias tus ntoo cuam, nyias tus quab nrog Yes Xus lawv Yes Xus qab. Peb zoo li Xis Moos Kws Les Nais nrog Yes Xus taug Ntoo Cuam kab ke. Ua neej nyob, peb muaj kev rhiab siab loj, muaj kev ntsawv siab ntau. Peb txhob ntshaw kev tau zoo tuag. Kev pe Ntoo Cuam, yog thov lees txhaum. Tim peb lub siab phem ua Yes Xus tuag. Kev pe Ntoo Cuam, yog thov Yes Xus poob tsim loj, txom nyem txaus txhawb peb lub zog hauv peb kev rhiab siab, hauv peb kev poob tsim, hauv peb kev ntsawv siab. Thov Yes Xus txhob tso peb pov tseg, tig ntsia peb lub neej lwj siab, khuv leej peb txom nyem tsis pom qab hais qhia leej twg.
Ib tsoom phooj ywg, thov kom hnub 6 Ntshiab, taug Ntoo Cuam kab ke thiab pe Ntoo Cuam coj peb los npuab Yes Xus kom ruaj thiab khov thiab yim hlub Huab Tais Yes Xus thiab peb leej tib neeg tuaj.
Monjoly 6 avril, 2017 CVChiv
Homélie de la veillée pascale samedi saint: Ib tsoom niam tsoom txiv, tsoom kwv tsoom tij, tsoom neej tsoom tsav thiab tsoom phooj ywg hmov tshua,
Hmo no, yog hmo ntshiab hmo huv, hmo no yog zoo hmo, tas zeej tsoom neeg ntseeg Kas Tos Liv thoob ntiaj teb txoos npoj qas ntws zoo siab hlo teev hawm Huab Tais Tswv Ntuj qhuas peb leej Huab Tais Yes Xus yeej hlo kev ploj, hla plaws kev tuag sawv tsees ciaj sia los nyob ib txhis. Yog ib hmos loj, yog ib hmos tshiab rau lub sim ceeb thiab rau peb txhua tus neeg ntseeg. Tim hmo no, lub sim ceeb tshoj tau kab, txhua tus neeg ntseeg xuas tau kev nce nto plaws ntuj. Tim muaj hmo no zoo hmo, peb txoj kev teev hawm Yes Xus raws Koom Txoos Kas Tos Liv qhuab thiab qhia, yog txoj kab tseeb kev teev hawm Yes Xus tiag, ua tus cag ruaj, teeb hauv paus khov coj peb tib neeg kev mus nto plaws lub ntsis ntuj, ciaj Tswv Ntuj sia ua Tswv Ntuj tub ki nyob mus ib txhis. Nej yuav tsum paub qhov tseeb. Tsuas muaj tib pab neeg teev Yes Xus thiaj yog tus cag, tsuas muaj tib pawg txoj kev teev Yes Xus thiaj yog lub hauv paus. Lub Koom Txoos Kas Tos Liv Yes Xus tsa thiaj yog Yes Xus lub Koom Txoos. Yes Xus tsuas muaj tib lub Koom Txoos xwb.
Nej muaj hmoo, yog nej nyob hauv Koom Txoos Kav Tos Liv. Nej yuav tsum zoo siab hlo thiab ua Huab Tais Tswv Ntuj tsaug txhua lub caij, txhua lub sij hawm, khi nej pluaj siab tuag nthi rau Koom Txoos Kas Tos Liv, nrog Koom Txoos Kav Tos Liv ua neej thaj yeeb thiab nyob nyab xeeb. Nej tsis txhob ntaus siab me, los ua siab coob siab ntau li tus nkauj feb los tus nraug fav. Nej thiaj li yuav tam zoj tus nkauj nyab mus ua neej puab cuab tsav tau nej lub yig, ntseeg Tswv Ntuj paus nto plaws ntsis, tau Tswv Ntuj koob muaj nws txiaj ntsig.
Nej cov los tshiab, Huab Tais Tswv Ntuj hlub nej, Tswv Ntuj tsis xav cia nej xuas kab mus poob qab, maub kev mus poob deg. Nej twb hnov tsab ntawv Kev Tsiv: “
1 Mos Xes thiab tsoom tub ki His Xas Lais seev yees zaj nkauj no rau Huab Tais, lawv hais tias: “Kuv yuav seev rau Huab Tais tus siab li siab, cuam sis nees thiab tus caij rau hauv hiav txwv dej KT 15,1.” Nej cov los txais lub Cim Ntxuav hmo no, hmo dawb hmo huv, nej tau koob tau hmoov. Thaum peb tsis tau paub Tswv Ntuj, peb tsuas pom tias ua li peb siab xav thiaj yog. Tiam sis, ua li peb xav ces ua peb plag. Ntshai ua li peb nyiam thiaj tau. Tiam sis, ua li peb nyiam ces dab tsi los piam. Peb xav tias muab qaib ntsuj, muab npua plig los kho ces peb yuav dim peb tus mob. Tiam sis, qaib ntsuj mus lawm dawb, npua plig mus lawm do, peb tus mob nws nyob nws tos. Nyiaj txiag phob tas plag, tsiaj txhu los piam, txiv yawg ntoog txiv yawg tus mob lwj liam. Peb yuav tsum xav kom thoob, mloog kom zoo Huab Tais Yes Xus thiaj yog tus tuaj cawm tau peb.
Nej cov tseem tsis tau los teev hawm Huab Tais Yes Xus, nej cuab ntsej mloog nws tshoj, khaws nws lus. Huab Tais Tswv Ntuj hlub peb ntiaj teb neeg tas txhua leej txhua tus. Tiam sis, peb tib neeg rov tsis txawj hlub peb tus kheej, ua siab hnyav, ua siab qeeb, ua siab me, tsis tso siab rau Huab Tais Tswv Ntuj, yog peb niam peb txiv. Huab Tais Tswv Ntuj yog tus loj, yog tus muaj hwj huam, tus tsim ntuj tsim teb. Peb twb mloog tsab ntawv chiv keeb hauv paus: “
27 Tswv Ntuj tsim neeg hauv nws tus duab li hauv Tswv Ntuj tus duab, nws tsim txiv neej thiab poj niam, nkawd yog nws tsim HP 1,27.” Kev teev hawm Tswv Ntuj yog txoj kev do, peb tsis yeem taug. Lwm yam kev cai teev hawm yog txoj kev fab, muaj caj hmab, cag ntoos dawm kev. Peb yeem taug txoj kev fab, tsis tuaj yeem taug txoj kev do.
Hmo no yog hmo Hla, hmo dawb hmo huv. Tim li cas, peb saib hmo no hmo muaj txiaj ntsim, hmo muaj nuj nqes rau peb tus neeg teev hawm Tswv Ntuj ? Peb ua neej nyob, tsis hais ib txwm nkauj nraug sib ntshaw, los ib nkawm niam txiv sib hlub, los ib khub phooj ywg sib raug zoo, yuav tsum muaj tej lub cim xwb xwb ua rau peb pom thiab paub tias txwm nkauj nraug sib ntshaw, nkawm niam txiv sib hlub los khub phooj ywg sib raug zoo. Yog tsis muaj cim ces tsis muaj sib ntshaw, tsis muaj sib hlub thiab tsis sib raug zoo. Hmo no, Huab Tais Tswv Ntuj txuas nkaus txoj sia tshiab tsa hlo nws Leej Tub Huab Tais Yes Xus siav tu, tuag nthi lawm, sawv tsees ciaj sia, hla plaws kev ploj, tsuj nthi kev tuag ntawm taw tsis txawj tuag ntxiv. Yog ib lub cim Tswv Ntuj ua loj tas nrho txhawb peb lub siab ntseeg thiab mloog Tswv Ntuj lus kom ruaj thiab khov tiag tiag. Kawg Huab Tais Tswv Ntuj xwb thiaj muaj peev xwm rhuav tau kev tuag pov tseg. Yog txoj kev cawm peb, nplij tau tag nrho peb kev tu siab ploj ntais, ua tau peb lub pliaj plhu chim zoo hlo luag ntxhi. Peb twb mloog Mas Tais tsab ntawv piav txog ob tug poj niam tu siab heev, vim Yes Xus tuag lawm. Nkawd sib yaum mus xyuas Yes Xus tom ntxa : Yes Xus sawv rov los, Yes Xus hais li no rau nkawd tom qhov ntxa :
“Neb txhob ntshai, neb mus tshaj xo rau kuv cov kwv tij kom lawv mus lawm Nkas Lis Lais, lawv yuav pom kuv ped Mt 28,10.” Nkawd ceeb tag, nkawd tsis xav tau tias yuav pom Huab Tais Yes Xus ciaj ciaj nrog nkawd txuas lus, nkawd ntshai, tiam sis, nkawd zoo siab tshaj plaws tsis muaj dab tsi pauv tau. Vim li no, peb ntseeg tias muaj ib hnub los txog, Tswv Ntuj yuav pub peb nrog nws Leej Tub Yes Xus sawv tsees cia nyob mus ib txhis tsis txawj ploj, tsis txawj tuag, ciaj ua Huab Tais Tswv Ntuj tub ki. Yog txoj kev peb ntshaw tshaj plaws saum yaj ceeb no thiab ua peb vam tos ntsoov nyob saum qaum ntuj.
Kwv tij neej tsa sawv daws, peb los taug txoj kev teev hawm Yes Xus, yog taug ib txoj kev tshiab, kev du, kev ncaj, kev tiaj tus. Yam li, peb yuav xyaum ua neeg siab dawb siab zoo, nrauj lub siab phem, siab dub, siab lim hiam pov tseg kom tu taw. Tsis txhob taug kev ua plees ua yis. Peb yuav niaj hnub siv zog thov Leej Ntuj Plig Ntshiab txhawb peb lub dag lub zog kom peb txhob qaug zog, ua neeg nquag thiab ua neeg siab loj siab dav muaj Huab Tais Yes Xus kev hlub tuaj nyob hauv peb.
Montjoly 04.04.2017 CVChiv
Homélie du dimanche de Pâques: Cov me nyuam, cov laus, kwv tij neej tsa thiab phooj ywg,
Hnub no yog ib hnub muaj txiaj ntsim loj tas nrho rau lub sim ceeb thiab rau peb tus neeg ntseeg Tswv Ntuj teev Tswv Ntuj. Vim hnub no yog hnub peb tus Huab Tais Yes Xus sawv hauv tsoom tub tuag los ciaj Tswv Ntuj sia. Vim li, peb yuav los nthuav ob peb los txog Huab Tais Yes Xus lub txiaj ntsim sawv ciaj sia, uas nws cog lus muab Tswv Ntuj txoj sia no rau peb.
Ib tsoom phooj ywg, peb ua leej tib neeg, peb ua dab tsi, peb xav kom zoo. Peb txoj dej num peb ua, peb xav kom tawg paj txi txiv. Peb sib qaws ua neej, peb xav kom tom thawj, kom ciaj ib cuab tsheej ib yig. Thaum peb tseem teev dab qhuas, peb xav kom dab tsis txhob looj koov auv mob auv ntsaj tuaj rau peb. Tiam sis, dab ntaim peb noj peb haus tas mus li tiam dhau tiam. Peb txoj kev teev dab qhuas pab tsis tau peb raws li peb lub siab nyiam, ua tsis tau rau peb li peb txoj kev vam, peb lub siab ntshaw. Ziag no, peb muab kev teev dab qhuas nrauj pov tseg. Peb los teev hawm Huab Tais Tswv Ntuj. Txoj kev teev hawm Tswv Ntuj muaj txiaj ntsim zoo li cas rau peb tib neeg tus los teev hawm Huab Tais Tswv Ntuj ? Yam li hnub no, yog hnub nyoog ua hmoov hwm peb tus Huab Tais Yes Xus tuag nthi ros sawv tsees ciajTswv Ntuj sia. Vim li cas yog ib lub txiaj ntsim loj tas nrho rau peb tus neeg ntseeg Tswv Ntuj thiab teev Tswv Ntuj ? Vim txoj kev teev hawm Huab Tais Tswv Ntuj loj tshaj plaws lwm txoj kev teev hawm uas muaj nyob ntiaj teb no, nej hnov hais txog uas nej qhov muag pom thiab nej paub.
Muaj pes tsawg txoj kev teev hawm uas nej hnov thiab nej paub ? Nej twb paub:
-Kev teev dab qhuas li Hmoob kev cai teev dab niam dab txiv.
-Nej twb paub kev teev hawm Phus Thas li hauj sam kev cai.
-Nej twb paub Mawv Xim Lim kev cai teev hawm.
-Tseem muaj ntau ntau hom kev cai teev hawm nyob ntiaj teb no tej zaum nej paub tsis tag. Tiam sis, nej yuav tsum muab tas tej kev teev hawm nyob ntiaj teb no coj los luj saum teev saib txoj kev teev hawm twg yog txoj muaj nqes tshaj thiab muaj txiaj ntsim tshaj rau cov tib neeg. Thaum peb muaj luj tas saum teev, xam tas hauv nruab siab. Peb pom tias peb txoj kev teev hawm, Huab Tais Tswv Ntuj yog txoj loj, yog txoj zoo thiab yog txoj muaj txiaj ntsim tshaj plaws. Hmoob hais tias loj yog Tswv Ntuj loj, siab yog Tswv Ntuj siab, muaj tseeb tiag. Txoj kev teev Huab Tais Tswv Ntuj yog txoj loj yog txoj zoo tiag tiag.
Peb txoj kev teev dab niam dab txiv, pab tau peb qee zaum, tiam sis cawm tsis tau peb. Peb tej poj yawm dua nras tag, ciaj ua plua av plua tshauv, tsis muaj ib tug sawv tsees hauv lub lav tuag txog tav no.
Txoj kev cai teev hawm Phus Thas los tib yam nkaus, qhuab qhia tib neeg mus taug txoj kev zoo. Kom nyias txawj cheem nyias lub siab kom txhob ntshaw noj ntshaw hnav, kom nyiaj taus tshaib taus nqhis, kom thev mob thev ntsaj…Tiam sis, Phus Thas los tuag dua toj lawm cawm tsis tau tib neeg thiab.
Txoj kev cai Mawv Xim Lim los kuj qhuab qhia tib neeg kom nquag, kom tsim txiaj, txhob quav dej quav cawv, ua neeg siab ncaj siab zoo. Mos Has Mes los kuj tuag dua toj ciaj plua av plua tshauv.
Tas nrho lwm tej kev cai teev hawm tsis muaj ib tug dhia dhau yuav sawv tsees tau hauv lub lav tuag los ciaj sia.
Kawg yog Huab Tais Yes Xus tib leeg kheej, lub cev ntaj ntsug tuag nthi, tiam sis Tswv Ntuj tshuab pa lub cev ntaj ntsug rov sawv tsees ciaj Tswv Ntuj sia los nyob niaj ib txhiab mus ib txhis. Vim li ntawd, hnub no, yog hnub Huab Tais Yes Xus sawv tsees ciaj Tswv Ntuj sia. Peb los ntseeg Yes Xus thiab teev Yes Xus, vim Yes Xus tib leeg xwb thiaj cawm tau peb ntawm kev tuag. Ua cas peb ntseeg, puas muaj tiag, puas ntseeg tau tias Yes Xus cawm tau peb ntawm kev tuag ?
Ib tsoom phooj ywg, muaj tseeb tiag thiab peb ntseeg tau tias Yes Xus cawm tau peb ntawm kev tuag. Yog Yes Xus tsis sawv hauv tsoom tuag los ces peb txoj kev ntseeg Yes Xus thiab teev Yes Xus tsuas piv tau li peb txoj kev teev dav qhuas, los piv tau rau lwm txoj kev cai teev hawm xwb, txawm siv zog teev npaum twg los tsis tau nuj nqes dab tsi. Tiam sis, vim Yes Xus sawv hauv tsoom tub tuag los lawm tiag. Nej hnov, Xis Moos Pob Zeb thiab tus thwj tim Yes Xus nyiam, nkawd ob leeg chaws mus hauv Yes Xus lub ntxa. Nkawd pom tias lub ntxa khoob vus lawm, tshuav cov ntaub khi tes taw tseem tais nyob rau hauv xwb. Yog ib lub cim qhia tias nws sawv lawm. Yog peb ntseeg Yes Xus tas siab tas ntsws tiag, ces peb yuav tau Yes Xus lub txiaj ntsim cawm peb. Kom nej nco ntsoov, peb leej tib neeg twg lub cev ntaj ntsug xub mus pem ntuj tshaj plaws ? Yog peb leej niam Mas Lias. Vim peb leej niam Mas Lias yog tus mloog Tswv Ntuj lus zoo tshaj tej, nws tau Tswv Ntuj txiaj ntsim ces nws thiaj li xub ua peb ntej dua pem ntuj lawm. Peb vam tias Yes Xus tsis dag peb. Muaj ib hnub los txog, tas peb lub cev ntaj ntsug thiab ntsuj plig yuav lawv peb leej niam Mas Lias qab mus pem ntuj tib yam nkaus.
File audio 1. Thứ năm tuần thánh 2. Thứ sáu tuần thánh 3. Vọng Phục sinh 4 Chúa nhật Phục sinh 
