Zaj nyeem Ib: Hauv yaj saub Yos Xuas phau ntawv, zaj 24 qib 14 txog 29. Cov His Xas Lais cog lus nyob Xis Kes:
Nyob Xis Kes, Yos Xuas hais rau cov His Xas Lais tias: “Tsoom His Xas Lais, nyem no, nej yuav hwm thiab tsob hwb HUAB TAIS raws txoj kev ntshiab kev ncaj. Cov dab uas thaum ub nej cov yawg koob teev nyob ntawm tus dej sab tid thiab nyob Hais Nkws Tos teb mas nej muab tso pov tseg, nej los tsob hwb HUAB TAIS. Tab sis yog nej tsis zoo siab tsob hwb HUAB TAIS, mas nej cia li xaiv ib co dab uas nej xav tsob hwb. Nej puas xaiv nej cov yawg koob thaud cov dab los puas xaiv cov As Mos cov dab, uas nyem no nej nyob hauv lawv teb chaws ? Ntawm kuv thiab kuv tsev neeg mas peb xav tsob hwb HUAB TAIS.”
Ces tsoom sid teb tias: “Peb tsis tso HUAB TAIS pov tseg mus teev lwm cov dab li ! Peb tus HUAB TAIS Tswv Ntuj tsis yog tus tau coj peb cov yawg koob thiab coj peb tawm hauv Hais Nkws Tos teb los lod ? Nws cawm peb dim ntawm lub tsev ua qhev. Nws tau ua hwj huam loj rau peb qhov muag pom xyeem. Thaum peb mus kev thiab peb hla pej kum teb chaws, nws tau txuag peb. Cov haiv neeg thiab cov As Mos uas lawv xub nyob teb chaws no, mas HUAB TAIS caum lawv khiav. Peb kuj yuav tsob hwb HUAB TAIS, vim nws yog peb tus Tswv Ntuj.”
Ces Yos Xuas hais rau tsoom sid tias: “Nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej cov txhaum rau nej. Yog nej tso HUAB TAIS pov tseg mus tsob hwb pej kum dab, mas HUAB TAIS kuj yuav hiam nej. Nws yog tus tau ua zoo rau nej, tab sis nws yuav ua kom nej ploj tas.”
Tsoom sid teb rau Yos Xuas tias: “Peb tsis xav teev dab. Tus peb xav tsob hwb yog HUAB TAIS.”
Ces Yos Xuas hais rau tsoom sid tias: “Nej rov ua tim khawv zeem tias nej tau xaiv txoj kev tsob hwb HUAB TAIS.”
Lawv teb tias: “Peb ua tim khawv zeem li ntawd !”
Yos Xuas hais tias: “Ua li mas nej ntiab pej kum neeg cov dab uas nyob hauv nruab nrab nej. Nej tig los cuag His Xas Lais tus HUAB TAIS Tswv Ntuj.”
Tsoom sid teb rau Yos Xuas tias: “Peb tus HUAB TAIS Tswv Ntuj yog tus peb xav tsob hwb. Peb xav mloog nws lub suab qhia peb !”
Hnub ntawd Yos Xuas nrog tsoom sid cog lus. Nws tsa ib co txhooj thiab ib txog cai rau lawv coj nyob Xis Kes. Yos Xuas sau cov lus ntawd tseg rau hauv phau ntawv hais txog Tswv Ntuj Txoj Cai. Nws ua li ntawd tas ces nws muab ib lub pob zeb loj los tsa nyob hauv tsob qab ntoo uas nyob hauv HUAB TAIS lub loog. Yos Xuas hais rau tsoom sid tias: “Nej ntsia, lub pob zeb no ua tim khawv txog peb vim nws tau hnov cov lus uas HUAB TAIS hais rau peb tas tib si. Lub pob zeb no yuav ua tim khawv txiav txim rau peb, vim nws tau hnov cov lus uas HUAB TAIS hais rau peb.”
Ces Yos Xuas tso sawv daws nyias rov mus nyias tsev. Thaum tej xwm no tshwm sim tuaj tas lawm, mas Yos Xuas uas yog Nuv tus tub thiaj tuag, nws muaj ib puas kaum xyoo.
Zaj nyeem Ob: Hauv Mas Tais ntawv Moo Zoo, zaj 19 qib 13 txog 15. Yes Xus thiab cov me nyuam:
Thaum ntawd, muaj neeg coj ib co me nyuam yaus tuaj rau Yes Xus kom Yes Xus tsa tes thov Ntuj rau lawv, tab sis cov thwj tim cem cov neeg ntawd. Yes Xus thiaj hais tias: “Nej cia cov me nyuam no tuaj cuag kuv mas, nej txhob txwv lawv; vim cov yuav tau Ntuj lub Ceeb Tsheej yog cov neeg zoo li cov me nyuam no.”
Ces Yes Xus tsa tes rau saum cov me nyuam ntawd tas, nws mam mus ntxiv.
Cov kwv tij, zaj nyeem hauv hnub no qhia peb txog kev ntseeg Tswv Ntuj; peb yuav pom tias Yos Xuas qhia tsoom His Xas Lais txog kev ntseeg Tswv Ntuj ntawd, mas lawv yuav coj zoo li cas.
“Nej yuav tsob hwb HUAB TAIS tsis tau, vim nws yog ib tug Tswv Ntuj ntshiab, nws yog ib tug Tswv Ntuj muaj khib, nws yuav tsis zam nej cov txhaum rau nej. Yog nej tso HUAB TAIS pov tseg mus tsob hwb pej kum dab, mas HUAB TAIS kuj yuav hiam nej. Nws yog tus tau ua zoo rau nej, tab sis nws yuav ua kom nej ploj tas.” Lo lus no yog lo lus Yos Xuas hais rau cov His Xas Lais thiab yog ib lo lus hais rau peb cov ntseeg sawv daws thiab.
Thaum peb txiav siab ntseeg lawm mas peb yuav ua tus neeg zoo li cov me nyuam; tsis muab hlob, txo tus kheej kom nqis, ua raws Ntuj Lus li cov me nyuam mloog cov laus hais, tsob hwb Tswv Ntuj.
Cov kwv tij, peb yuav ua tus neeg ntseeg li ntawd tau mas ua ntej tsaj yog peb yuav tsum ‘txhob muab hlob’ vim kev txhob muab hlob yuav ua kom peb ntsia txhua yam raws li lub siab tiaj tus thiab xyiv fab pom.
