Zaj Nyeem Hnub Tim 15 Lub 8 Hli Xyoo 2019 (Lời Chúa ngày 15.08.2019 bằng tiếng H'mong)

Cập nhật lúc 06:15 15/08/2019

Zaj nyeem Ib: Hauv yaj saub Yos Xuas pau ntawv, zaj 3 qib 7 txog 10a ntxiv qib 11 thiab qib 13 txog 17. Tsoom His Xas Lais hla tus dej Yos Las Das:

HUAB TAIS hais rau Yos Xuas tias: “Hnub no, kuv yuav ua kom koj loj tuaj rau tas tsoom His Xas Lais pom, kom lawv paub tias kuv yuav nrog koj ib yam li kuv nrog Mais Xes. Koj yuav ceeb toom rau cov Leej Choj kwv lub Xab Cog Lus li no: thaum nej mus txog ntawm ntug dej Yos Las Das lawm, nej yuav mus nyob hauv nruab nrab tus dej.”
Ces Yos Xuas hais rau cov His Xas Lais tias: “Nej txav los mloog HUAB TAIS Tswv Ntuj cov lus !”
Yos Xuas hais tias: “Nej yuav pom tias Tswv Ntuj yog ib tug Tswv Ntuj muaj txoj sia nyob hauv nruab nrab nej, vim nej yuav pom ib yam zoo li no: HUAB TAIS uas yog tus Tswv kav tas lub ntiaj teb, nws lub Xab Cog Lus yuav hla tus dej Yos Las Das ua nej ntej. Thaum cov Leej Choj kwv HUAB TAIS lub Xab Cog Lus mus tsuj cov dej Yos Las Das, mas tam sim ntawd dej yuav tsis ntws ntxiv. Cov dej yuav nres ua ib pawg nyob pem hauv dej ! Thaum tsoom pej xeem His Xas Lais sawv kev mus hla tus dej Yos Las Das, mas cov Leej Choj kwv lub Xab Cog Lus mus ua sawv daws ntej. Thaum ntawd yog lub caij sau nplej, tus dej Yos Las Das phwj dhau ob sab ntug. Cov kwv lub Xab Cog Lus nyuam qhuav txog ntawm ntug dej Yos Las Das xwb, cov Leej Choj ko taw nyuam qhuav tsuj cov dej, ces cov dej ntws pem hauv los theem kiag, thiab dej teev kiag ua ob lub pas dej siab siab nyob ob sab, txij As Das mus txog lub yeej Xas Taas. Hos cov dej nram hav ntws mus txog lub hiav txwv daw ntsev hu ua hiav txwv As Las Npas. Tsoom pej xeem hla dej ncaj ntawm lub tsheej Yes Lis Kos. Cov Leej Choj uas lawv kwv lub Xab Cog Lus, lawv sawv ntsug nyob hauv nruab nrab tus dej Yos Las Das, lawv ko taw qhuav tsis ntub dej, thiab tas tsoom His Xas Lais kuj hla dej, ko taw tsis ntub dej li. Tas haiv His Xas Lais hla dej zoo li ntawd.

Zaj nyeem Ob: Hauv Mas Tais ntawv Moo Zoo, zaj 18 qib 21 txog zaj 19 qib 1. Tus tub txib tsis hlub luag:
Thaum ntawd, Pob Zeb txav los hais rau Yes Xus tias: “Huab Tais, yog kuv tus kwv ua txhaum rau kuv, kuv yuav zam pes tsawg zaus ? Kuv puas yuav zam txog xya zaus ?”
Yes Xus hais rau Pob Zeb tias: “Kuv tsis hais rau koj tias ‘xya zaus’. Kuv hais rau koj tias, ‘xya caum xya zaus’.”
Yes Xus hais ntxiv tias: “Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. Tus tub txib txhos caug ntua ntawm tus tswv ko taw, nws pe tus tswv, nws hais tias: “Thov koj ua siab ntev rau kuv, kuv yuav them kom tas rau koj.”
Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias: “Them koj cov nqi.”
Nws tus npawg txhos caug ntua ntawm nws ko taw thov tias: “Thov koj ua siab ntev rau kuv, kuv yuav them rau koj.”
Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws. Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. Ces tus vaj hu tus tub txib tuaj, nws hais rau tus tub txib ntawd tias: “Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. Ua cas koj tsis hlub koj tus npawg zoo li kuv tau hlub koj ?”
Ces tus vaj npau taws heev, nws muab tus tub txib rau cov tub hiam neeg mus txog hnub nws them nws cov nuj nqis tas huv tib si. Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.”
Thaum Yes Xus hais cov lus ntawd tas, nws tso Nkas Lis Lais teb tseg, nws mus rau Yus Das teb sab dej Yos Las Das tim ub.

Cov kwv tij sawv daws, nyob hauv hnub no Tswv Ntuj tab tom qhia peb txog kev zam txhaum rau lwm tus; li peb tau nyeem hauv zaj paj lug Huab Tais Yes Xus hais rau cov thwj tim txog tus tub txib tsis hlub luag.  Peb yuav pom tias tus vaj zam cov nuj nqis rau tus tub txib, tab sis tus tub txib ntawd tsis zam rau nws tus phooj ywg; yog li thaum kawg nws thiaj rov raug tus vaj muab rau txim.
Huab Tais Yes Xus hais tias “Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.”
Cov kwv tij, yog li peb sawv daws yuav tsum paub zam txhaum rau lwm tus mog; tsis yog zam ib zaug xwb tab sis zam tas mus li; li Huab Tais Yes Xus hais rau Pob Zeb tias “Kuv tsis hais rau koj tias xya zaus, kuv hais rau koj tias xya caum xya zaus.”
Peb yuav ua li mas peb thiaj yuav tau kev zam hauv Tswv Ntuj rau peb.

zootswvzovyaj.com