“Nej txhob pub zoo li nej khuv khuv xim, thiab zoo li yog luag yuam nej” 2 KLN 9: 7
Zaj nyeem Ib: Hauv phau ntawv Kos Lis Nthos tsab 2, zaj 9 qib 6 txog 10. Kev sau nyiaj pab luag yuav coj tej yam zoo tuaj rau sawv daws:
Nej yuav nco ntsoov tias, tus tseb nplej tsawg, nws kuj yuav sau tau tsawg, tus tseb nplej ntau nws yuav sau tau ntau. Nej nyias yuav pub raws li nyias txiav nyob hauv nyias siab. Nej txhob pub zoo li nej khuv khuv xim, thiab zoo li yog luag yuam nej, vim Tswv Ntuj nyiam tus zoo siab luag ntxhi pub. Tswv Ntuj muaj hwj huam, nws yuav pub tas ib puas tsav yam txiaj ntsim los pauj rau nej, ua li mas nej yuav muaj tas txhia yam txaus siv, thiab tseem yuav seem ib co txaus pub rau luag. Raws li Ntawv sau tseg tias: ‘Nws ua siab dav pub paj tshab, nws pub rau cov pluag ; nws txoj kev ua neeg ncaj yuav nyob mus li. 10 Tus muab noob nplej rau tus tswv teb cog, thiab muab mov los yug nws, haj yam yuav muab noob qoob noob loo ntau rau nej: nws yuav ua kom cov noob txi txiv rau hauv nej lub siab ncaj huam vam.
Zaj nyeem Ob: Hauv Zam ntawv Moo Zoo, zaj 12 qib 24 txog 26. Yes Xus qhia tias nws txoj kev tuag yog nws lub koob meej:
Kuv hais qhov muaj tseeb tiag rau nej: Yog lub noob nplej uas poob rau hauv av tsis tuag, mas nws nyob nws, ua ib lub noob twm zeej. Hos yog nws tuag, mas nws txi txiv ntau. Tus twg nyiam nws txoj sia, mas nws plam nws txoj sia. Hos nyob hauv lub qab ntuj no, tus twg tsis khuv xim nws txoj sia, mas nws yuav ceev nws txoj sia kom ciaj nyob mus li. Tus twg tsob hwb kuv, mas nws yuav tsum los raws kuv. Kuv nyob qhov twg, kuv tus tub txib kuj yuav nyob qhov ntawd thiab. Tus twg tsob hwb kuv, mas Leej Txiv yuav saib nws muaj tsim.
Nyob hauv hnub no, Tswv Ntuj qhia peb txog kev pub rau lwm tus, mas peb yuav zoo siab thiab tsaus siab muab mas thiaj phim rau Ntuj siab nyiam. Peb ua yam twg los thov kom peb muab siab rau thiab txhob vam tias lawv yuav pauj peb, vim tus yuav pauj rau peb yog Tswv Ntuj. Peb ua zoo rau lawv, peb yuav tau qgov zoo rov qab. Peb ua phem rau luag, peb yuav tau qhov phem ntawd los. Zoo li Huab Tais Yes Xus lo lus tias tus twg nyiam nws txoj sia, mas nws plam nws txoj sia. Hos nyob hauv lub qab ntuj no, tus twg tsis khuv xim nws txoj sia, mas nws yuav ceev nws txoj sia kom ciaj nyob mus li. Yog li thov kom peb ua yam twg los peb zoo siab hlo ua mog.
