Lời Chúa Thứ Tư, ngày 07.08.2019 bằng tiếng H'mong (Zaj Nyeem Hnub Tim 7 Lub 8 Hli Xyoo 2019)
Cập nhật lúc 10:02 07/08/2019
Lis piam 18 lub Caij Nruab Xyoos
Zaj nyeem Ib: Hauv phau ntawv Xam Phaj, zaj 13 qib 1 txog 2 ntxiv qib 25 txog zaj 14 qib 1. Lawv mus xyuas Kas Nas Has teb:
HUAB TAIS hais cov lus no rau Mais Xes: “Koj xa ib co neeg mus xyuas Kas Nas Has teb, xyuas lub chaws uas kuv muab rau cov His Xas Lais. Koj xa cov thawj coj, ib lub xeem ib tug neeg mus.”
Lawv mus xyuas teb chaws tau plaub caug hnub, lawv mam rov qab los txog. Lawv los cuag Mais Xes, As Loos, thiab tsoom His Xas Lais nyob hauv lub hav suab puam Pas Las, hauv Kas Des. Lawv piav rau Mais Xes thiab rau tas tsoom pej xeem mloog. Lawv muab tej qoob loo, tej txiv hmab txiv ntoo uas lawv nqa los rau sawv daws saib. Lawv piav li no: “Peb mus txog lub teb chaws uas koj xa peb mus. Muaj tseeb tiag, yog ib lub teb chaws uas mis nyuj thiab zib ntab zib muv ntws lug. Peb nqa tej yam no los rau nej saib. Tab sis haiv neeg nyob lub teb chaws ntawd muaj peev xwm kawg, lawv tej nroog loj dav thiab xov ntsa zeb ntsa tsua, peb tau pom As Nav cov xeeb ntxwv. Cov As Mas Les Xis nyob hauv lub xeev Nes Zes sab Naj, cov His Tis, cov Yes Npus Xis, thiab cov As Mos nyob pem roob, hos cov neeg Kas Nas Has nyob raws ntug hiav txwv thiab raws tus ntug dej Yos Las Das.”
Kas Les txhib tsoom pej xeem uas tuaj sib sau ncig Mais Xes tias: “Peb yuav tsum sawv kev mus, peb mus ntaus kom tau lub teb chaws: peb muaj peev xwm ua tau xwb.”
Tiam sis cov txiv neej uas tau nrog nws mus, teb tias: “Peb yuav ntaus tsis yeej haiv neeg ntawd li, vim lawv muaj zog dua peb.”
Ces lawv thuam lub teb chaws uas lawv tau mus xyuas rau cov His Xas Lais, lawv hem tias: “Lub teb chaws uas peb mus xyuas mas yog ib lub teb chaws noj neeg. Cov neeg peb tau pom yog ib cov neeg siab siab. Peb pom ib co neeg loj loj kawg. Peb zoo nkaus li cov kooj nyob ntawm lawv ib sab, lawv los yeej saib peb zoo ib co kooj xwb.”
Ces tas tsoom pej xeem tsa suab nthe zom zaws. Hmo ntawd lawv quaj ib hmos.
Zaj nyeem Ob: Hauv Mas Tais ntawv Moo Zoo, zaj 15 qib 21 txog 28. Tus poj niam Kas Nas Has ntseeg:
Yes Xus tawm ntawm qhov chaw ntawd, nws mus rau Tws Los thiab Xis Doos teb. Muaj ib tug poj niam Kas Nas Has nyob hauv teb chaws ntawd tuaj. Nws hu nrov tias: “Huab Tais, Das Vis Leej Tub, thov koj khuv leej kuv: kuv tus ntxhais raug ib tug dab phem tsiv kawg.”
Yes Xus tsis teb ib los li. Cov thwj tim txav los thov tias: “Koj ua rau nws, vim nws pheej hu nrov nrov lawv peb qab.”
Yes Xus teb rau lawv tias: “Ntuj xa kuv tuaj cawm cov yaj ploj hauv His Xas Lais tsev neeg xwb.”
Tab sis tus poj niam twb tuaj txog ze lawm, nws txhos caug ntawm Yes Xus xub ntiag, nws thov tias: “Huab Tais, thov koj pab kuv!”
Yes Xus teb rau nws tias: “Tsis phim muab me nyuam tej mov pov rau me nyuam dev.”
Tus poj niam teb tias: “Huab Tais, yog li koj hais. Tab sis cov me nyuam dev tsuas noj tej tsig mov txeej ntawm lawv tus tswv lub rooj los xwb!”
Ces Yes Xus teb rau nws tias: “Niam phauj, koj lub siab ntseeg loj kawg. Kom koj tau raws li koj lub siab xav.”
Ces nws tus ntxhais zoo hlo tam sis ntawd.
Nyob hauv hnub no, peb yuav pom tias cov His Xas
Lais lawv mus pom thaj tsam Tswv Ntuj cog lus tias yuav pub rau lawv, lawv zoo
siab kawg; tab sis muaj ntau haiv neeg nyob ze thaj tsam ntawd, mas lawv ntshai
nrog cov neeg ntawd ua rog. Yog li lawv thiaj rov sib hem lawv tias thaj tsam
ntawd tsis zoo. Nyob hauv peb lub neej muaj ntau zaus muaj ntau tus hais ub
hais no txog peb txoj kev ntseeg tias ntseeg lawm peb yuav tau dab tsi, Ntuj
Ceeb Tsheej tsis muaj tseeb. Mas peb yuav ua siab tawv qhawv nyob hauv peb txoj
kev ntseeg, peb thiaj yuav pom Ntuj Ceeb Tsheej tau. Peb yuav ntseeg li tus poj
niam Kas Nas Has, txawm tias Huab Tais Yes Xus hais rau nws tias Huab Tais Yes
Xus raug xa los cawm cov His Xas Lais xwb, los nws yeej tsis tso nws qhov
ntseeg pov tseg. Yog li ntawd Huab Tais Yes Xus pom tias nws ntseeg rauj khov
thiaj pub txiaj ntsim rau nws. Peb yuav tsum muaj kev ruaj khov rau txoj kev
ntseeg li nws.
zootswvzovyaj.com
