Zaj Nyeem Hnub Tim 16 Lub 8 Hli Xyoo 2019 (Lời Chúa mỗi ngày bằng tiếng H'mong)

Cập nhật lúc 07:03 16/08/2019

Zaj nyeem Ib: Hauv tus yaj saub Yos Xuas phau ntawv, zaj 24 qib 1 txog 13. Yos Xuas ntuas cov His Xas Lais nyob Xis Kes:

Yos Xuas hu tas nrho cov xeem His Xas Lais tuaj nyob Xis Kes. Nws hu cov txwj laus His Xas Lais, cov nom tswv, cov txiav txim thiab cov thoob xwm ntawv tuaj sawv ua tej phiaj nyob ntawm Tswv Ntuj xub ntiag. Ces Yos Xuas hais rau tsoom sid sawv daws tias: “Tsoom His Xas Lais tus HUAB TAIS Tswv Ntuj hais li no: Thaum ub, nej cov yawg koob nyob sab dej tid. Yog Tes Las uas nws yog Has Nplas Has thiab Nas Hos nkawd txiv. Thaud, lawv teev lwm cov dab. Kuv tau hu Has Nplas Has thiab tau coj nws mus hla tas nrho cov teb chaws Kas Nas Has. Kuv tau pub kom nws muaj tub ki, muaj xeeb zeej xeeb ntxwv huam vam. Kuv pub His Xas Has rau nws. Kuv pub Yas Kos thiab Es Xas Ws rau His Xas Has. Kuv muab lub roob Xes Is rau Es Xas Ws yuav ua nws tug. Yas Kos thiab nws cov tub tsiv mus nram Hais Nkws Tos teb. Ces kuv thiaj tau xa Mais Xes thiab As Loos nkawd tuaj thiab tau tso xwv txheej los raug Hais Nkws Tos teb. Kuv mam li pab kom nej tawm los. Kuv coj nej cov yawg koob tawm los. Thaum lawv los txog ntawm lub Hiav Txwv, mas cov Hais Nkws Tos caij tsheb caij nees tuaj caum lawv txog ntawm lub Hiav Txwv Tauj. Lawv hu txog HUAB TAIS, ces HUAB TAIS tso huab tuaj thaiv nej ntawm cov Hais Nkws Tos thiab nws tso dej hiav txwv nphau los nyab lawv. Nej qhov muag tau pom tej yam kuv ua nyob Hais Nkws Tos teb. Nej tau los nyob ntev xyoo nyob hauv teb chaws suab puam. Ces kuv tau coj nej los nyob hauv lub teb chaws As Mos uas nyob sab dej Yos Las Das tim ub. Lawv sawv ua rog ntaus nej, tab sis kuv muab lawv rau hauv nej tes, ces nej tau lawv lub teb chaws los ua nej lub cuab tam, vim kuv tau ua kom lawv ploj ntshis nyob ntawm nej xub ntiag. Tus vaj Muas kuj tau sawv ua rog rau His Xas Lais. Nws tso neeg mus hu Npas Las Has tuaj tsawm nej. Tab sis kuv tsis kam mloog Npas Las Has, ces Npas Las Has tseem tau foom lus zoo txog nej thiab kuv tau cawm nej dim ntawm nws txhais tes. Thaum nej hla dej Yos Las Das los txog Yes Lis Kos, cov neeg kav Yes Lis Kos ua rog rau nej. Cov As Mos, cov Pes Lis Xis, cov Kas Nas Has, cov His Tis, cov Zis Nkas Sis, cov His Vis thiab cov Zes Npws kuj sawv ntaus nej, tab sis kuv tau muab lawv los zwm rau nej huv tib si. Kuv tau tso ib co nkawj ua nej ntej mus caum ob tug vaj As Mos. Ces nej tsis tau siv ntaj los siv hneev. Lub teb chaws kuv muab rau nej mas tsis yog nej tau khwv txhim. Cov tsheej uas nej mus nyob hauv mas tsis yog nej tau khwv ua. Cov txiv cawv thiab txiv roj uas niaj hnub nej noj mas tsis yog nej tau khwv cog.”

Zaj nyeem Ob: Hauv Mas Tais ntawv Moo Zoo, zaj 19 qib 3 txog 12. Nug txog kev sib nrauj:
Ib co Fas Lis Xais los cuag Yes Xus, lawv xav sim nws, lawv hais rau nws tias: “Puas muaj cai nrauj yus poj niam vim qhov ub qhov no ? ”
Yes Xus teb tias: “Nej tsis tau nyeem tias, thaum chiv lub keeb, tus Tsim neeg, nws tsim kom muaj txiv neej thiab poj niam, thiab nws hais tias: Vim qhov ntawd, mas txiv neej yuav tso nws niam nws txiv tseg mus npuab nws poj niam, ob tug ntawd yuav ua ib lub cev nqaij xwb ? Vim li ntawd, nkawd tsis yog ob leeg lawm, nkawd yog ib lub cev nqaij xwb. Qhov uas Tswv Ntuj sau los ua ke, mas neeg tsis txhob muab cais.”
Lawv teb rau Yes Xus tias: “Vim li cas Mais Xes ho hais kom ua ntawv nrauj thaum yus nrauj yus poj niam ?”
Yes Xus hais rau lawv tias: “Yog vim nej lub siab twm xeeb, ces Mais Xes thiaj kheev kom nej nrauj poj niam. Tab sis thaum chiv lub keeb, mas tsis yog li ntawd. Kuv hais rau nej: tus twg nrauj nws poj niam, nws ho rov yuav dua ib tug, nws yog ib tug muaj txij nkawm mus deev hluas. Qhov no tsis hais txog tus poj niam uas mus nrog lwm tus txiv neej ua dev ua npua.”
Cov thwj tim hais rau Yes Xus tias: “Yog txiv neej yuav tsum ua zoo li ntawd rau nws tus poj niam, mas txhob yuav poj niam zoo dua.”
Yes Xus hais rau lawv tias: “Tsis yog sawv daws yuav to taub cov lus no, tsuas yog cov uas Ntuj pub rau, mas lawv thiaj to taub. Muaj ib co neeg nyob tab seeb, vim lawv yug los ua tsis taus txiv neej. Muaj ib co nyob tab seeb, vim neeg muab lawv sam. Hos muaj ib co neeg txhob txwm nyob tab seeb vim Ntuj lub Ceeb Tsheej. Leej twg txawj to taub, mas cia nws to taub.”

Nyob hauv hnub no, Tswv Ntuj qhia peb kom siv peb lub tswv yim los xav txog lub hom phiaj ntawm kev ua neeg. Tswv Ntuj tsim tib neeg kom muaj txiv neej thiab poj niam; kom tau los sib sau ua txij nkawm nyob hauv txoj kev nyiam kev hlub. Muaj ntau tus tau sib sau los nyob ua cuab ua yim, muaj qee tus nyob tas seeb; tsis yog lawv tsis muaj txij nkawm, lawv tus txij nkawm yog Ntuj Ceeb Tsheej vim lawv muab txoj kev nyiam kev hlub pub rau Tswv Ntuj.
Peb yuav pom tias nyob hauv cov His Xas Lais lub neej, mas Tswv Ntuj txoj kev hlub ib txwm nrog lawv cov yawg koob nyob los tas mus li; nyob hauv peb sawv daws los yeej zoo li ntawd thiab. Thov kom peb sawv daws ntsia peb tus kheej kom pom Tswv Ntuj txoj kev nyiam kev hlub nyob hauv peb thiab peb yuav muab Tswv Ntuj txoj kev hlub no rau lwm tus. Vim hom phiaj ntawm kev ua neeg yog Tswv Ntuj txoj kev hlub.

zootswvzovyaj.com