Bài Suy Niệm Chúa Nhật XIII Thường Niên, Năm B Dành Cho Cộng Đoàn H'mong
Cập nhật lúc 06:16 01/07/2018
PEB YOG TSWV NTUJ COV ME NYUAM TIAG
Xub hais ib qib lus NUG tso zoo li no tias: Lo lus qhia tias : “PEB TSOOM NTSEEG UA TUB TSHAJ NTUJ LUS” mas peb zoo siab khaws tseg- Tab sis xav paub tias: yog peb muab siab rau ua Ntuj lub luag hauj lwm ntawd, mas thiaj yuav tau txi txiv zoo li cas ?”
TEB: yeej txi txiv ncw muaj nqe loj kawg, vim tias yuav tau muaj peb ib cov kwv tij uas lawv yuav rov yug los tshiab dua ua Tswv Ntuj cov me nyuam ntag- Zoo li peb hais kam zaj nkauj teev Ntuj zoo li no tias:
Yes Xus, peb rov yug los nyob hauv koj –Peb luag ntxhi mus li nyob hauv lub txiaj ntsim HLA.
Mas tsim nyog peb xub qhib peb siab los txais Ntuj Lo Lus- Tom qab ntawd peb yuav rov xav dua txog qhov tseem ceeb ntxiv tias Huab Tais Yes Xus nrog peb nraim – Nws nrog peb koom hawm Tswv Ntuj ntag.,
TXAIS NTUJ LUS: Tus Hauv Paus Xa Lus Zam txhab zog rau peb tej kev ntseeg zoo li no tias:’ “Huab Tais Leej Txiv txoj kev nyiam peb loj tas npaum no: yam li peb hu ua Tswv Ntuj cov me nyuam- Peb yog Tswv Ntuj cov me nyuam tiag- Nyem no, peb twb yog Tswv Ntuj cov me nyuam lawm “ 1 Zam 3: 1-2 ‘ Txhais tias: tsis tas yuav tos txog hnub peb yuav chaws mus hauv Tswv Ntuj lub Ceeb Tsheej ces thaum ntawd peb thiaj yuav tau hu ua Tswv Ntuj cov me nyuam - Qhov tseeb kuj mus li no tias: “Nyem no, peb twb yog Tswv Ntuj cov me nyuam lawm “
Hos peb tseem zoo siab twm tus Hauv Paus Xa Lus Paj Lug lo lus tias: ”Txhua leej txhua tus uas Tswv Ntuj Leej Tswv Yim coj , mas lawv yog Tswv Ntuj cov me nyuam tas huv tib si – Nej tsis txhob rov qab poob rau hauv txoj kev ntshai - Mas nej hu tau Tswv Ntuj tias: AS NPAS ! TXIV“ Los Mas 8:14-15 Txhais tias: peb tau txais lub Cim Ntxuav lawm, mas Tswv Ntuj Leej Tswv Yim coj peb lub neej, ces peb nyob kaj lug kaj nrig hu tau Tswv Ntuj tias: AS NPAS ! TXIV“,
Ua li ntawd, txhua txhia zaus uas peb teev hawm Tswv Ntuj mas peb tsa muag los hais tau tias PEB TXIV NYOB SAUM NTUJ, KOJ LUB NPE NTSHIAB NTO MOO LUG- KOJ LUB CEEB TSHEEJ LOS TXOG…
……………………………………………………………………………………….
Cov kwv tij phooj ywg , peb tus Huab Tais Yes Xus niaj hnub nrog nraim peb nyob, raws li Huab Tais tau cog tseg ( Mas Tais 28: 20 ) –Nws nrog peb koom teev hawm Tswv Ntuj ntag - Nws ua li ntawd kuj yog thaum Huab Tais sau peb los nrog nws ua Thaj Txi Ntuj- Tiam sis hauv yus tsev ( yus nrog yus tsev neeg sib sau teev hawm Tswv Ntuj ) thiab thaum peb nyob peb, peb nyob twj ywm, mas Huab Tais kuj nyob ntawd. Mas Huab Tais nrog nraim peb nyob ,tsis tu ncua- Yeej muaj tuaj raws li lo lus tseem ceeb uas Huab Tais tau cog tseg tias:” Thaum ob leeg los peb leeg sib sau ua ke tuav txog kuv lub npe, mas kuv nyob hauv nruab nrab lawv “ ( Mas Tais 18:20 ). Cov kwv tij, peb nyob kaj lug kaj nrig ntseeg ruaj nreb khov kho tias:tab txawm peb tsis pom Huab Tais ntsej muag ( thiab tsis hnov nws lub suab ) los Huab Tais saib xyuas peb -“Nws hlub tshua peb ntau tshaj qhov peb thov” Es Fes Xos 3:20)–Nws nrog peb koom ua ib lub suab teev hawm Tswv Ntuj ntag-Nws muab nws tej lo teev Ntuj xyaws peb tej zaj lus ntag
TEEV NTUJ: “Huab Tais Leej Txiv ,peb ua koj tsaug vim koj tau xaiv peb ib cov kwv tij Hmoob ntseeg txog koj- Thov koj xa Leej Ntuj Plig Ntshiab nqes los tshoj peb siab kom xwv peb nyob kaj lug kaj nrig ntseeg ruaj nreb tias koj Leej Tub, peb tus Huab Tais Yes Xus, nrog nraim peb nyob , tsis tu ncua- Nws muab peb tej zaj teev Ntuj nce mus pem Tswv Ntuj lub Ceeb Tsheej tas mus li. Peb ua koj tsaug ntau”
T.P. Txhiaj Foom omi
