TSOOM NTSEEG SAWV DAWS UA TUB TSHAJ NTUJ LUS
Cov kwv tij Hmoob uas tau txais lub Cim Ntxuav thiab lub Cim Txhab Zog ,mas nej twb paub tias nej tau txais Ntuj lub luag hauj tseem ceeb raws li tus Hauv Paus Xa Lus Paj Lug ,yam nej sawv daws ua tau tim khawv txog lub Moo Zoo ntag. Ces thov kom nej mloog tej qib lus uas Leej Ntshiab Paj Lug tau tshaj tawm txog nws
lub luag hauj lwm tshaj Ntuj Lus rau tej pab neeg uas nyuam qhuav ntseeg Ntuj-
Leej Ntshiab Paj Lug sau li no tias:”
Peb yog cov neeg nrog Huab Tais Yes Xus Pleev koom siab ua hauj lwm- Peb yog Huab Tais Yes Xus cov tiam lis , kom xwv nej plhis mus ua Tswv Ntuj txoj kev ncaj “ 2 Kos Lis Nthos 5:20 + 6:1 Leej Ntshiab Paj Lug tseem sau lus zoo li no tias:
“Peb yog ib cov neeg uas Tswv Ntuj xa tuaj” - - 2 Kos Lis Nthos 2:17
Cov kwv tij, tsim nyog ua Huab Tais Yes Xus tsaug , rau qhov tias Huab Tais ( uas nws mus lawm saum ntuj ) nws niaj hnub no vam txog ib cov neeg ntseeg cuag li Paj Lug los mus tshaj lub Moo Zoo- Ces, peb zoo siab nco tias lub caij puag thaud, ib pab neeg coob tau lawb dab – Dhau qhov ntawd,
cov ntseeg tshiab ntawd tau xyaum taug txoj kev nyiam Tswv Ntuj thiab lawv lawv coj tau lub neej ruaj nreb raws li Huab Tais Yes Xus tus piv txwv. Cov kwv tij, nej tsoom ntseeg sawv daws, mas lub zim txwv no, nej muaj peev xwm hais tib zaj lus zoo cuag li Leej Ntshiab Paj Lug tias:”
Peb yog ib cov neeg uas Tswv Ntuj xa tuaj” . Txhais tias: qhov muaj nqe tshaj plaws hauv nej nruab siab ( uas yog tej kev ntseeg Ntuj tuag nthi thiab tej siab ntsws nyiam Tswv Ntuj ) mas yuav tsis muab yus tej kev ntseeg ntawd los zais twj ywm - Tiam sis
nej yuav zoo siab tshaj tawm rau peb ib cov kwv tij, thiab cov phooj ywg uas lawv tseem coj dab qhuas – Lub zim txwv no, nej sawv daws kuj muaj peev xwm ua Ntuj lub luag hauj lwm ntawd ,vim tias:”
Nej yog ib cov neeg uas Tswv Ntuj xa tuaj” Leej Ntshiab Paj Lug tej lo lus, mas peb nyias zoo siab rov hais dua, hauv nyias nruab siab – Uas yog Lo Lus no tias:”
Peb yog cov neeg nrog Huab Tais Yes Xus Pleev koom siab ua hauj lwm - Peb yog Huab Tais Yes Xus cov tiam lis , kom xwv nej plhis mus ua Tswv Ntuj txoj kev ncaj “
Ua li ntawd, nej lub neej ntseeg Ntuj thiaj yog ib lub neej muaj hwj chim loj ,vim tias “
Huab Tais Yes Xus siv nej lub ncauj los mus hu cov kwv tij ntawd nrog Tswv Ntuj rov sib haum xeeb” 2 Kos Lis Nthos 5:20.
TEEV NTUJ : Huab Tais Yes Xus, Tswv khuv leej tas nrho , thov koj xa Leej Ntuj Plig Ntshiab nqes los txhab zog rau cov kwv tij Hmoob ( uas twb ntseeg Ntuj lawm ) kom xwv lawv kub siab mloog koj Lo Lus uas hu lawv mus tshaj lub Moo Zoo rau peb ib cov kwv tij neej tsa , ces thiaj yuav tau muaj peb ib cov Hmoob ntseeg tshiab “
plhis mus ua Tswv Ntuj cov me tub me nyuam” –Huab Tais , ua koj tsaug ntau..
Txiv Plig Txhiaj Foom omi
